हैदराबादः राज्याच्या वनमंत्री कोंडा सुरेखा यांच्या मुलीने त्यांच्या (मुख्यमंत्री) आणि इतरांविरुद्ध केलेल्या वक्तव्यावरून निर्माण झालेल्या वादाच्या पार्श्वभूमीवर, तेलंगणाचे मुख्यमंत्री ए. रेवंथ रेड्डी यांनी आज (ता. ३) वनमंत्री कोंडा सुरेखा यांना मंत्रिमंडळातून तत्काळ वगळण्याचा निर्णय घेतला आहे. या संदर्भात राज्यपाल शिवप्रताप शुक्ला यांना शिफारस करण्यात आली आहे, असे मुख्यमंत्री कार्यालयातून जाहीर केलेल्या प्रसिद्धीपत्रकात म्हटले आहे.
राज्याच्या वन आणि देवस्थान मंत्री सुरेखा त्यांच्या मुलीने मुख्यमंत्री आणि पक्षाच्या इतर नेत्यांविरुद्ध केलेल्या टीकात्मक वक्तव्यांमुळे वादाच्या भोवऱ्यात सापडल्या आहेत. सत्ताधारी पक्षाचे आमदार आणि पदाधिकारी यांनी याबाबत तीव्र प्रतिक्रिया व्यक्त केल्या आहेत. सुरेखा यांना पदावरून दूर केल्यानंतर, मुख्यमंत्र्यांनी जी. चिन्ना रेड्डी यांची राज्य नियोजन मंडळाच्या उपाध्यक्षपदी झालेली नियुक्तीही तत्काळ प्रभावाने रद्द केली.
गेल्या काही दिवसांत दिल्लीत मुख्यमंत्री रेवंत रेड्डी, त्यांचे उपमुख्यमंत्री मल्लू भट्टी विक्रमार्का आणि प्रदेश काँग्रेस अध्यक्ष बी. महेश कुमार गौड यांनी पक्षाध्यक्ष मल्लिकार्जुन खर्गे आणि के. सी. वेणुगोपाल यांच्यासह एआयसीसी नेत्यांसोबत घेतलेल्या बैठकांनंतर या घडामोडी घडल्या. काँग्रेसच्या राज्य शाखेच्या शिस्तपालन समितीने यापूर्वी पक्ष नेतृत्वाला सुरेखा आणि चिन्ना रेड्डी यांच्यावर कठोर कारवाई करण्याची शिफारस केली होती.
सुरेखा यांनी राजधानीत खर्गे आणि पक्षाच्या कामकाजाच्या एआयसीसी प्रभारी मीनाक्षी नटराजन यांचीही भेट घेतली होती आणि त्यांच्यासमोर आपली बाजू मांडली होती. पत्रकारांशी बोलताना त्या म्हणाल्या, की आपल्याला मंत्रिमंडळात कायम ठेवण्याची विनंती आपण मुख्यमंत्र्यांना केली आहे. मंत्री म्हणून आपली कामगिरी चांगली असून आपल्यावर भ्रष्टाचाराचे कोणतेही आरोप नाहीत, असे ठामपणे सांगितले.
मुख्यमंत्री आणि इतरांविरुद्ध आपल्या मुलीने केलेल्या वक्तव्याचा निषेध न केल्याबद्दल तिच्यावर शिस्तभंगाची कारवाई करण्याची काँग्रेसच्या अनेक आमदारांनी केलेल्या मागणीकडे लक्ष वेधत सुरेखा म्हणाल्या, की कोणताही आमदार स्वेच्छेने बोलला नाही आणि त्यांच्यामागे निश्चितपणे कोणाचा तरी दबाव होता. मात्र, नव्याने वाद होण्याची शक्यता व्यक्त करून, त्यांनी कोणाचा दबाव होता, हे सांगण्यास नकार दिला. शिस्तपालन समितीने बजावलेल्या नोटीसवर त्यांनी आक्षेप घेतला आणि आपल्याविरोधात बोलणाऱ्यांविरुद्ध शिस्तभंगाची कारवाई करण्यात यावी, अशी मागणीही सुरेखा यांनी केली.
पक्षाच्या ज्येष्ठ नेत्या सोनिया गांधी, राहुल गांधी आणि प्रियांका गांधी वद्रा यांच्यासह इतर वरिष्ठ नेत्यांना ईमेल पाठवून आपली बाजू मांडली आहे, असे त्यांनी सांगितले.
