नागपूर: कळमेश्वर नगरपालिका निवडणुकीच्या पार्श्वभूमीवर राजकीय प्रचारातून वातावरण चांगलंच तापले असून, प्रचार न करण्याच्या कारणावरून काँग्रेसच्या एका माजी नगरसेवकाने एका युवकाचं अपहरण करून त्याला बेदम मारहाण केली आहे. जखमी युवकाने याप्रकरणी नागपूरमधील माजी नगरसेवक हरीश ग्वालबंशी यांच्यावर गंभीर आरोप लावले आहेत. पोलिसांनी ग्वालबंशीसह पाच जणांविरोधात गुन्हा दाखल केला असून तिघांना अटक केली आहे.
आरिफ लतिफ शेख (वय ४१, रा. कळमेश्वर) असे मारहाण झालेल्या युवकाचे नाव आहे. आरिफने पोलिसांत दिलेल्या तक्रारीनुसार, रविवारी रात्री त्याला आशिष ग्वालबंशीचा फोन आला. त्याने हरीश ग्वालबंशी यांना भेटायला ये, असं फोनवरून सांगितले. मात्र, आरिफने भेटायला जायला नकार दिला आणि तो जेवण करण्यासाठी दुसरीकडे गेला. रात्री सुमारे अकरा वाजण्याच्या सुमारास आरिफ हा विसावा बारसमोर फोनवर बोलत उभा होता. याचवेळी बारमधून काही आरोपी आले. त्यांनी आरिफला शिवीगाळ करत लाठी आणि दगडांनी बेदम मारहाण सुरू केली. मारहाण केल्यानंतर आरोपींनी त्याला बळजबरीने त्यांच्या कारमध्ये बसवले आणि कार नागपूरच्या दिशेने पळवली. कारमध्येही आरिफला मारहाण करण्यात आली. अखेरीस, फ्रेंड्स कॉलनी परिसरात पोहोचल्यावर त्याला पुन्हा मारहाण करून रस्त्यावर सोडून देण्यात आले.
आरिफने या प्रकाराची माहिती त्याच्या मित्रांना दिली आणि त्याला तातडीने मेयो रुग्णालयात उपचारासाठी दाखल करण्यात आले. आरिफच्या दाव्यानुसार, हरीश ग्वालबंशी यांनी त्याला “तू काँग्रेससाठी काम का करत नाहीस आणि भाजपला का पाठिंबा देत आहेस?” असा सवाल विचारून ही मारहाण केली. आरिफच्या तक्रारीवरून पोलिसांनी माजी नगरसेवक हरीश ग्वालबंशी, राजेश उर्फ राजू सोनारे, अनिकेत अनिल उईके (२८), रोशन बबन यादव (३२) आणि आशीष ग्वालबंशी (२५) (सर्व रा. मकरधोकडा) यांच्या विरोधात अपहरण आणि मारहाणीचा गुन्हा दाखल केला आहे. पोलिसांनी अनिकेत, रोशन आणि आशीष या तिघांना तत्काळ ताब्यात घेतले आहे. या घटनेमुळे कळमेश्वरमधील राजकीय वातावरण आणखी तापले आहे.
