बंगळुरूः कर्नाटकातील सरकारी शाळांमध्ये शिकणाऱ्या मुलांसाठीच्या मोफत बूट आणि मोजे योजनेमुळे गंभीर प्रश्न निर्माण झाले आहेत. ‘विद्या विकास योजने’अंतर्गत विद्यार्थ्यांना वाटण्यात आलेले बूट काही दिवसांतच फाटू लागले आहेत. पालकांकडून मोठ्या संख्येने तक्रारी येत असल्याने प्रशासनाला कारवाई करावी लागली आहे.
पालकांचे म्हणणे आहे की सरकारने वितरित केलेले बूट अत्यंत निकृष्ट दर्जाचे असून, वापरल्यानंतर अवघ्या काही दिवसांतच ते फाटत आहेत. बुटांसोबत दिलेल्या मोज्यांचा दर्जाही अत्यंत निकृष्ट असल्याचे सांगण्यात येत आहे.
पालकांचे म्हणणे आहे की, अनेक मुलांना खूप मोठे किंवा चुकीच्या मापाचे बूट दिले गेले आहेत, ज्यामुळे त्यांना ते घालणे अवघड जाते. गेल्या वर्षी दिलेल्या बुटांचा दर्जा यापेक्षा खूपच चांगला होता, असा दावाही त्यांनी केला.
अशा तक्रारी सातत्याने समोर येत असल्याने आणि संपूर्ण प्रकरणाला राजकीय स्वरूप आल्याने, उपलोकयुक्त, न्यायमूर्ती के. एन. फणिंद्र यांनी या प्रकरणाची वैयक्तिक दखल घेतली आहे. त्यांनी राज्यातील १५ जिल्ह्यांमध्ये या प्रकरणाची प्राथमिक चौकशी करण्याचे आदेश दिले आहेत. बुटांच्या गुणवत्तेत एवढा मोठा निष्काळजीपणा कसा आणि कोणामुळे झाला, याचा शोध घेण्यासाठी राज्य सरकारने अंतर्गत चौकशी सुरू केली आहे.
