नवी दिल्लीः भारतीय रिझर्व्ह बँकेने (आरबीआय) ‘यूपीआय टॅप अँड पे’ प्रणाली सादर केली आहे. या सुविधेमुळे वापरकर्ते आपला ‘एनएफसी’ सक्षम ‘स्मार्टफोन अनलॉक’ करून आणि ‘टर्मिनल’वर ‘टॅप’ करून ‘एनएफसी’ सक्षम ‘पॉइंट-ऑफ-सेल’ (पीओएस) यंत्रणेवर रकमेचा भरणा करू शकतील. कोणत्याही ‘स्मार्ट फोन’ला सक्रिय ‘इंटरनेट कनेक्शन’ नसतानाही ‘यूपीआय’द्वारे पैसे देणे अधिक सोपे होऊ शकते.
‘डिजिटल पेमेंट’ अधिक सोपे करणे आणि ग्राहक सेवा व सुरक्षितता सुधारणे, या उद्देशाने केलेल्या दोन नवीन सुधारणांचा भाग म्हणून, ‘आरबीआय’चे गव्हर्नर संजय मल्होत्रा यांनी १० सप्टेंबर रोजी या सुविधेची घोषणा केली.
तथापि, ‘यूपीआय टॅप अँड पे’ सर्वच ठिकाणी इंटरनेटशिवाय काम करू शकणार नाही. व्यवहारासाठी वापरकर्त्याच्या फोनला इंटरनेटची आवश्यकता नसते, कारण पेमेंटसाठी ‘पीओएस’ यंत्राच्या इंटरनेट कनेक्शनचा वापर केला जाऊ शकतो. ही नवीन प्रणाली यूपीआय पेमेंटला कॉन्टॅक्टलेस कार्ड पेमेंटप्रमाणे काम करण्यास मदत करण्यासाठी तयार करण्यात आले आहे.
लहान रकमेच्या व्यवहारांसाठी, वापरकर्ते यूपीआय पिन न टाकता ५,००० रुपयांपर्यंतचे व्यवहार करू शकतात. ५,००० रुपयांपेक्षा जास्त रकमेच्या व्यवहारांसाठी, पीओएस टर्मिनलवर यूपीआय पिन टाकावी लागेल.
