नवी दिल्ली: मतदार याद्यांमध्ये फेरफार केल्याच्या आरोपावरून, विरोधी पक्षांनी मुख्य निवडणूक आयुक्त ज्ञानेश कुमार यांच्या विरोधात मोहीम सुरू केली आहे. विरोधी नेत्यांनी त्यांच्या राजीनाम्याच्या मागणीसाठी निवडणूक आयोगाच्या कार्यालयावर आज (ता. ६) मोर्चा काढला. परंतु, पोलिसांनी त्यांना रोखल्यानंतर काँग्रेसचे नेते खासदार राहुल गांधी आणि खासदार प्रियांका गांधी वड्रा यांनी ऑल इंडिया रेडिओ कार्यालयाच्या आवारात आंदोलन केले.
निवडणूक आयोगाच्या कार्यालयाला भेट देण्यावर ते ठाम आहेत. हे दोन्ही काँग्रेस खासदार दीड तासाांहून अधिक काळ ऑल इंडिया रेडिओच्या आवारात ठाण मांडून बसले आहेत. यापूर्वी, राहुल गांधी तिरंगा हातात घेऊन बॅरिकेडवर चढताना दिसले होते. दरम्यान, पोलिसांनी समाजवादी पार्टीचे अध्यक्ष अखिलेश यादव आणि तृणमूल काँग्रेसचे नेते अभिषेक बॅनर्जी यांना ताब्यात घेतले आहे.
मतदार यादीत केलेल्या वादग्रस्त बदलांवरून विरोधी पक्षांचे नेते, मुख्य निवडणूक आयुक्त (सीईसी) ज्ञानेश कुमार यांना हटवण्याची मागणी करत आहेत. नीती आयोगाच्या कार्यालयासमोर सुरक्षा कर्मचाऱ्यांनी निवडणूक आयोगाकडे जाणारा इंडी अलायन्सचा मोर्चा रोखला. आंदोलनादरम्यान खासदारांनीही ज्ञानेश कुमार यांच्या विरोधात घोषणाबाजी केली.
निवडणूक आयोगाच्या मुख्यालयाकडे जाणारा विरोधी पक्षांचा मोर्चा पोलिसांच्या बॅरिकेड्स लाऊन रोखण्यात आला. राहुल गांधी आणि प्रियांका गांधी यांनी याच ठिकाणी धरणे आंदोलन केले. नंतर समाजवादी पक्षाचे प्रमुख अखिलेश यादव तिथे आले. खासदारांनी मुख्य निवडणूक आयुक्त ज्ञानेश कुमार यांच्या विरोधात ‘मतचोर’ अशा घोषणा दिल्या.
राहुल गांधी आणि प्रियांका गांधी ऑल इंडिया रेडिओ संकुलात एका झाडाखाली बसले. काँग्रेससह विरोधी पक्षांनी मुख्य निवडणूक आयुक्त ज्ञानेश कुमार यांच्या विरोधात आपले आंदोलन चालू ठेवले. काँग्रेस खासदार पवन खेडा म्हणाले, की आम्ही ज्ञानेश कुमार यांच्यावर कधीच विश्वास ठेवला नाही, पण आता आमची खात्री पटली आहे की ते विश्वास ठेवण्यायोग्य व्यक्ती नाहीत.
समाजवादी पक्षाचे खासदार राम गोपाल यादव म्हणाले, की यापेक्षा महत्त्वाचे काहीही नाही. लोकांची मते पुसली गेली तर, बंगालमध्ये घडल्याप्रमाणे मोठ्या प्रमाणावर मते पुसून सत्ता काबीज केली गेली तर, लोकशाहीला काय अर्थ आहे? याविरोधात आंदोलन झाले नाही, तर इतर सर्व आंदोलने निरर्थक ठरतात.
काँग्रेस खासदार विवेक तंखा म्हणाले, की हा लोकशाही वाचवण्याचा लढा आहे. निवडणूक आयोग ज्या प्रकारे सरकारच्या हातातील कठपुतळी म्हणून काम करत आहे, ते स्वीकारार्ह नाही, म्हणूनच संपूर्ण देश रस्त्यावर उतरला आहे.
समाजवादी पार्टीच्या खासदार इकरा हसन म्हणाल्या, की एका अहवालात स्पष्टपणे म्हटले आहे की १४ वेळा एकमताने निर्णय होऊ शकला नाही. विरोधी पक्ष पहिल्या दिवसापासून म्हणत आहे की ज्ञानेश कुमार भाजपच्या एजंटसारखे काम करत आहेत.
आरएसएसचा गणवेश परिधान केलेल्या विरोधी पक्षाच्या खासदारांनी इंडी आघाडीच्या मोर्चादरम्यान मुख्य निवडणूक आयुक्त ज्ञानेश कुमार यांचे कटआउट्स घेतले होते. जंतर मंतर परिसरात मोठ्या संख्येने दिल्ली पोलीस कर्मचारी तैनात करण्यात आले होते.
निवडणूक आयोगाच्या कार्यालयाबाहेर आणि जवळपासच्या अनेक ठिकाणी बॅरिकेड्स उभारण्यात आले आहेत. कोणताही गोंधळ किंवा कायदा व सुव्यवस्थेची समस्या टाळण्यासाठी पोलीस लोकांच्या आणि वाहनांच्या हालचालींवर लक्ष ठेवून आहेत. कोणत्याही परिस्थितीला तोंड देण्यासाठी सुरक्षा दलांना पूर्णपणे सज्ज राहण्याचे निर्देश पोलिसांनी दिले आहेत.
