रियाधः सौदी अरेबियाच्या धाहरान शहरातील अरामकोच्या एका प्रशासकीय इमारतीला हूती बंडखोरांनी लक्ष्य केले आहे, अशी माहिती सौदी अरेबियाच्या ऊर्जा मंत्रालयातील एका अधिकाऱ्याने दिली. या हल्ल्यानंतर इमारतीमध्ये मोठी आग भडकली. सौदी फौजांनी या हल्ल्याला प्रत्युत्तर दिले, असे मंत्रालयाने प्रसिद्धीस दिलेल्या एका निवेदनात म्हटले आहे. या हल्ल्यात कोणतीही जीवितहानी झालेली नाही किंवा कोणी जखमी झाल्याचे वृत्त नाही.
मंगळवारी येमेनच्या हूतींनी सौदी अरेबियाच्या तेल सुविधांजवळील सर्व कर्मचारी आणि नागरिकांना स्थलांतरित होण्याचा इशारा दिला होता आणि ही ठिकाणी कायदेशीर लक्ष्य असल्याचे म्हटले होते.
हूती बंडखोरांचे प्रवक्ते याह्या सारी यांनी दिलेला हा इशारा, सौदीच्या नेतृत्वाखालील आघाडीने हूती नियंत्रित येमेनची राजधानी सना येथील येमेनी ऑइल कंपनीच्या अल सबाह मध्यवर्ती स्थानकातून नागरिकांना बाहेर काढण्याच्या आदेशामुळे प्रेरित झाला होता. सारी यांनी आघाडीच्या माघारीच्या आदेशाला प्रत्युत्तर देताना, सनावरील कोणत्याही हल्ल्याचा सौदी अरेबियाची राजधानी रियाधवर “कठोर आणि वेदनादायी प्रतिहल्ला केला जाईल, असा इशारा दिला होता.
हूतींनी रियाधच्या दिशेने डागलेली क्षेपणास्त्रे सौदी अरेबियाने रोखली. नागरी संरक्षण प्रवक्त्याने सांगितले की, रोखण्यात आलेल्या दोन क्षेपणास्त्रांच्या ढिगाऱ्यामुळे चार जण जखमी झाले आणि १५ घरांचे नुकसान झाले आहे.
सौदीच्या नेतृत्वाखालील आघाडीने लोकांना बाहेर काढण्याचा आदेश दिल्यानंतर लगेचच, सनामध्ये स्फोटांचे आवाज ऐकू आले. हूतींशी संलग्न असलेल्या प्रसारमाध्यमांनी सांगितले की, सौदी-समर्थित सैन्याने केलेल्या हवाई हल्ल्यांमध्ये राजधानीच्या अल सबा भागातील एका तेल सुविधेला लक्ष्य करण्यात आले.
हूती अधिकाऱ्यांना या हल्ल्याचा अंदाज असावा असे दिसते. तेल कंपनीच्या एका अधिकाऱ्याने सांगितले की त्यांच्या साठवण टाक्या रिकाम्या होत्या आणि सौदीच्या हल्ल्याचा तेल साठ्यावर किंवा रहिवाशांसाठीच्या पुरवठ्यावर कोणताही परिणाम होणार नाही. तरीही, तुटवड्याच्या भीतीने काही पेट्रोल पंपांवर गाड्यांच्या रांगा लागल्या होत्या, असे शहरातील प्रत्यक्षदर्शींनी सांगितले.
सौदीच्या नेतृत्वाखालील आघाडीचे प्रवक्ते मेजर जनरल तुर्की अल मलिकी यांनी हूतींवर या सुविधेचा आणि तेथील भूमिगत इंधन गोदामांचा वापर त्यांच्या क्षेपणास्त्रे आणि ड्रोनच्या शस्त्रागारासाठी करत असल्याचा आरोप केला. स्फोटांच्या वृत्तांनंतर, सारी यांनी सांगितले की सनामध्ये हूती लढवय्ये सौदी समर्थित सैन्याशी सामना करत आहेत.
