गुवाहाटीः भारतीय जनता पक्षाच्या नेतृत्वाखालील एनडीएने आसाममधील पहिल्या सिल्चर महानगरपालिका निवडणुकीत दणदणीत विजय मिळवला आहे. एनडीएने ४२ पैकी ३४ जागा जिंकल्या आहेत, तर मित्र पक्ष आसाम गण परिषदेने दोन जागा मिळविल्या आहेत. या निवडणुकीतील सर्वांत विशेष गोष्ट म्हणजे मतदान इलेक्ट्रॉनिक व्होटिंग मशीनद्वारे (ईव्हीएम) नाही, तर मतपत्रिकेद्वारे झाले, त्यामुळे राजकीय वर्तुळात त्याचे महत्त्व अधोरेखित झाले आहे.
या निवडणुकीत एकट्या भाजपने ३२ जागा जिंकल्या, तर त्यांचा मित्रपक्ष असलेल्या आसाम गण परिषदेने (एजीपी) दोन जागा मिळवल्या. यामुळे एनडीएची एकूण संख्या ३४ झाली आहे. दुसरीकडे, काँग्रेस पक्षाला केवळ दोन जागांवर समाधान मानावे लागले, तर अपक्ष उमेदवारांनी सहा जागा जिंकल्या.
निवडणुकीच्या निकालानंतर, आसामचे मुख्यमंत्री हिमंता विश्व शर्मा यांनी काँग्रेस पक्षावर जोरदार हल्ला चढवला. ‘एक्स’ या सोशल मीडिया प्लॅटफॉर्मवर आपला आनंद व्यक्त करताना ते म्हणाले की, पंतप्रधान नरेंद्र मोदी यांच्या ‘विकसित भारता’च्या दूरदृष्टीला आणि अजेंड्याला जनतेने पूर्णपणे मान्यता दिली आहे.
मतपत्रिकेवरील निवडणुकांवर टीका करताना मुख्यमंत्री शर्मा म्हणाले, की काँग्रेस मतपत्रिकेद्वारे मतदान झाल्यानंतरही काँग्रेस पराभूत होते. सत्य हे आहे की मतपत्रिकेवर काँग्रेसचा त्याहूनही मोठा पराभव होतो. कधीकधी, ईव्हीएम पाहून लोक घाबरतात आणि चुकून चुकीच्या ठिकाणी मतदान करतात किंवा ‘नोटा’चा वापर करतात. पण जनता मतपत्रिकेद्वारे मतदान करण्यात पटाईत आहे. त्यामुळे जेव्हा जेव्हा मतपत्रिकेद्वारे निवडणुका होतात, तेव्हा काँग्रेसचा त्याहूनही मोठ्या फरकाने पराभव होतो.
आसाम भाजपचे अध्यक्ष दिलीप सैकिया यांनीही काँग्रेस पक्षावर निशाणा साधत म्हटले की, काँग्रेस पक्ष नेहमी ईव्हीएममधील फेरफाराबद्दल तक्रार करतो, पण यावेळी मतपत्रिका वापरून निवडणुका घेण्यात आल्या आणि निकाल सर्वांना स्पष्ट आहे: काँग्रेस पक्षाला कोणतीही प्रगती करता आली नाही.
