जम्मूः जम्मू-काश्मीरमध्ये बेकायदेशीरपणे राहणाऱ्या बांगलादेशी आणि रोहिंग्या बेकायदा स्थलांतरितांना हद्दपार करण्याची प्रक्रिया चालू राहणार आहे. सोमवारी (ता. ५) १५० बांगलादेशी घूसखोरांना पश्चिम बंगालमधील बागडोगरा विमानतळावर आणण्यात आले.
सर्व काही सुरळीत पार पडल्यास, बुधवारी दुसऱ्या विमानाने आणखी १५० जणांना हद्दपार केले जाणार आहे. अधिकाऱ्यांनी सांगितले की, सध्या श्रीनगरच्या पंथाचौक येथे एक तात्पुरते निवारा केंद्र उभारण्यात आले आहे. या केंद्राचा उपयोग बेकायदेशीर स्थलांतरितांच्या हालचालींवर निर्बंध घालण्यासाठी आणि त्यांना तात्पुरता निवारा देण्यासाठी केला जाईल.
केंद्रीय गृह मंत्रालयाच्या मार्गदर्शनाखाली, जम्मू आणि काश्मीर पोलिसांनी खोऱ्यात बेकायदेशीरपणे स्थायिक झालेल्या बांगलादेशी नागरिकांना ताब्यात घेतले आहे. इतर आवश्यक कायदेशीर प्रक्रिया पूर्ण झाल्यानंतर, त्यांच्या राष्ट्रीयत्वाची पडताळणी करून प्रवासाची कागदपत्रे जारी केली जातील आणि त्यानंतर त्यांना देशाबाहेर पाठवले जाईल.
काश्मीरमध्ये कामगारांवरील वाढत्या हल्ल्यांच्या पार्श्वभूमीवर, पोलिसांनी त्यांच्या सुरक्षेची खात्री करण्यासाठी त्यांची नोंदणी करण्याची मोहीम सुरू केली होती.
या काळात, काही कामगारांच्या कागदपत्रांमध्ये लक्षणीय विसंगती आढळून आल्या आणि चौकशीअंती ते बांगलादेशी असल्याचे निष्पन्न झाले. अशा ३०० लोकांना एका तात्पुरत्या निवाऱ्यात ठेवण्यात आले आहे. आणखी काही जणांविषयी माहिती गोळा केली जात आहे.
वैद्यकीय व्हिसावर नाशिकला भेट देण्यासाठी कोलकात्याला आलेला एक बांगलादेशी नागरिक काश्मीरमध्ये पोचला. त्याचा मोबाईल फोन हरवल्यावर तो तक्रार करण्यासाठी पोलीस ठाण्यात गेला आणि अधिकाऱ्यांनी त्याची चौकशी केली.
त्याने सांगितले की तो या शहराला भेट देण्यासाठी आला होता. संबंधित पोलीस अधिकाऱ्यांनी या संदर्भात एफआरआरओ अमृतसरशी संपर्क साधला, तेव्हा त्यांना कळवण्यात आले की, वैद्यकीय व्हिसा धारकाला उपचारानंतर देशातील पर्यटन स्थळांना भेट देण्यावर कोणताही सर्वसाधारण निर्बंध नाही.
मात्र, अधिकाऱ्यांनी त्याची सविस्तर चौकशी करून त्याला तत्काळ कोलकाता येथे परत पाठवण्याचा सल्ला दिला आहे. पोलीस त्याची कागदपत्रे, प्रवासाचा तपशील, व्हिसाच्या अटी आणि भारतातील वास्तव्याचा कालावधी याची पडताळणी करत आहेत.
