नवी दिल्ली: ‘ब्रिक्स’ परिषद भरविल्याने भारताला नेमका कोणता फायदा मिळेल, या काँग्रेसचे ज्येष्ठ नेते पी. चिदंबरम यांच्या खोचक प्रश्नाला, त्यांच्याच पक्षाचे ज्येष्ठ नेते खासदार शशी थरूर यांनी सडेतोड उत्तर दिले. ही परिषद भारताची राजकीय संघटन शक्ती दर्शवते, असे थरूर यांनी म्हटले आहे.
दिल्लीतील ‘ब्रिक्स शिखर परिषदे’पूर्वी बोलताना, ‘ग्लोबल साउथ’साठी हे एक अत्यंत महत्त्वाचे व्यासपीठ असल्याचे थरूर यांनी स्पष्टपणे सांगितले.
‘ग्लोबल साउथ’साठी भारत एक महत्त्वाचे व्यासपीठ उपलब्ध करून देत आहे. ‘ग्लोबल साउथ’ गटात १०० हून अधिक देश असले, तरी त्यांचे प्रतिनिधित्त्व करणारे ११ प्रमुख देश उपस्थित राहणार आहेत. हे देश एकत्रितपणे परस्पर विचारांमधील वैविध्याचे प्रतिनिधित्व करतात. हा गट जगातील बहुसंख्य लोकसंख्येचे आणि जागतिक ‘जीडीपी’च्या ४१ टक्क्यांचे प्रतिनिधित्व करतो, असे थरूर यांनी सांगितले.
उर्वरित जगाने ही बाब अत्यंत गांभीर्याने घेतली पाहिजे, असे सांगून ते पुढे म्हणाले, की शिखर परिषदेचे आयोजन ही प्रतिष्ठेची बाब असून, या परिषदेला जागतिक महत्त्व आहे.
केवळ ‘ब्रिक्स’चे सदस्यच नव्हे, तर राष्ट्रपती आणि पंतप्रधान स्तरावरील काही निरीक्षकांसह डझनभर राष्ट्रप्रमुख आणि सरकारप्रमुखांचे येणे, ही भारतासाठी अत्यंत प्रतिष्ठेची बाब आहे. ही एक विशिष्ट राजनैतिक संघटनशक्ती दर्शवते, ज्याला जागतिक स्तरावर स्वतःचे असे महत्त्व आहे.
