नवी दिल्लीः नवी दिल्लीत होणाऱ्या ‘१८ व्या ब्रिक्स शिखर परिषद २०२६’ दरम्यान गुन्हेगार आणि समाजकंटकांच्या हालचालींच्या गुप्त माहितींची देवाणघेवाण करण्याबरोबरच विशेष सुरक्षा योजना लागू करण्यासाठी, दिल्ली आणि हरियाणा पोलिस परस्पर सहकार्याने तयारी करत आहेत. या संदर्भात, आगामी आंतरराष्ट्रीय परिषदेच्या पार्श्वभूमीवर आंतरराज्यीय समन्वय अधिक मजबूत करण्यासाठी ३१ ऑगस्ट रोजी दोन्ही राज्यांतील वरिष्ठ पोलिस अधिकाऱ्यांची एक उच्चस्तरीय बैठक आयोजित करण्यात आली होती.
या बैठकीचे अध्यक्षस्थान दिल्ली पोलिसांच्या उत्तर विभागाचे पोलिस सहआयुक्त आणि सोनीपतच्या पोलिस आयुक्तांनी संयुक्तपणे भूषवले. या बैठकीला बाह्य उत्तर जिल्ह्याचे उपआयुक्त शोभित डी. सक्सेना, सोनीपत जिल्ह्यातील वरिष्ठ अधिकारी आणि दिल्लीच्या उत्तर विभागाला लागून असलेल्या सीमावर्ती जिल्ह्यांतील उच्च अधिकारी उपस्थित होते.
सीमा सुरक्षा कशी मजबूत करावी आणि आंतरराज्यीय गुन्हेगारीला आळा कसा घालावा, यावर बैठकीत सविस्तर चर्चा झाली. दोन्ही राज्यांच्या पोलिसांनी पुढील गोष्टी करण्याचा निर्णय घेतला:
* सीमावर्ती भागांमध्ये सुरक्षा व्यवस्था अत्यंत कडक केली जाईल.
* संशयास्पद हालचाली आणि गुन्हेगारांवर लक्ष ठेवण्यासाठी संयुक्त तपास मोहीम राबवली जाईल.
* दोन्ही पोलिस दले समाजकंटक आणि गुन्हेगारांशी संबंधित गुप्त माहितीची एकमेकांशी विनाविलंब देवाणघेवाण करतील.
आंतरराज्य गुन्ह्यांमध्ये सामील असलेल्यांविरुद्ध कठोर कारवाई करण्यावर, तसेच प्रलंबित वॉरंटची जलद अंमलबजावणी करण्यावर एकमत झाले. याशिवाय, सीमावर्ती भागात राहणाऱ्या संशयितांच्या पडताळणीला गती देण्याचा निर्णय घेण्यात आला. सायबर गुन्हेगारीचा सामना करण्यासाठी एक उत्तम माहिती प्रणाली विकसित करण्यावरही भर देण्यात आला.
नवी दिल्लीत होणाऱा हा आंतरराष्ट्रीय कार्यक्रम लक्षात घेता, कायदा व सुव्यवस्था आणि शांतता राखण्यासाठी जिल्हा आणि उपविभागीय स्तरावर पोलिस अधिकाऱ्यांच्या नियमित बैठका देखील घेण्यात येणार आहेत.
