नवी दिल्ली: रशियावर निर्बंध लादणे आणि रशियाची ऊर्जा विकत घेणाऱ्या अन्य देशांवर शुल्क आकारल्यास, जागतिक अर्थव्यवस्थेवर आणि त्यांच्या देशावर काय परिणाम होतील, याचे विश्लेषण करण्यासाठी अमेरिकेचे अध्यक्ष डोनाल्ड ट्रम्प यांना ६० दिवसांचा कालावधी हवा आहे, असे अमेरिकेचे परराष्ट्रमंत्री मार्को रुबियो यांनी येथे सांगितले. शनिवारी उझबेकिस्तान आणि भारताच्या दौऱ्यावर जाण्यापूर्वी पत्रकारांशी बोलताना रुबियो म्हणाले, की नवी दिल्लीसाठी रशियन ऊर्जेपासून एका दिवसात दूर होणे कठीण आहे.
हे निर्बंध केवळ रशियावरचे निर्बंध नव्हते. त्यात भारत आणि इतर अनेक देशांवरील शुल्काचाही समावेश आहे. म्हणूनच निर्बंध आणि जकात दोन्ही लादल्याने, जागतिक अर्थव्यवस्थेवर आणि अमेरिकेच्या अर्थव्यवस्थेवरही काय परिणाम होईल, याचे विश्लेषण करणे आवश्यक आहे, असे अमेरिकेच्या एका वरिष्ठ राजनैतिक अधिकाऱ्याने सांगितले.
ट्रम्प यांनी शुक्रवारी राष्ट्रीय हिताचे कारण देत ‘लिंडसे ओ ग्रॅहम सँक्शनिंग रशिया अँड इराण ॲक्ट’ अंतर्गत असलेले निर्बंध आणि शुल्क रद्द केले. युक्रेनचे कट्टर समर्थक आणि ११ जुलै रोजी निधन पावलेले रिपब्लिकन सिनेटर लिंडसे ग्रॅहम यांच्या सन्मानार्थ नाव दिलेल्या या कायद्याने, ट्रम्प यांना मॉस्कोवर व्यापक निर्बंध लादण्याचा आणि भारत व चीनसह रशियाच्या तेल किंवा नैसर्गिक वायूच्या पाच सर्वांत मोठ्या खरेदीदारांकडून अमेरिकेत आयात होणाऱ्या वस्तूंवर १०० टक्क्यांपर्यंत शुल्क लावण्याचा अधिकार दिला होता.
जेव्हा हे विधेयक मंजूर झाले, तेव्हा त्यात सवलती देण्यामागे एक कारण हे होते, की सध्या जगात घडत असलेल्या घटना पाहता, त्यांना याचा अभ्यास करण्यासाठी काही कालावधी लागेल हे स्पष्ट झाले होते, असे रुबियो म्हणाले. त्यांनी अमेरिका-इराण युद्ध, सौदी अरेबियावरील हूती बंडखोरांचे हल्ले आणि युक्रेन व रशिया यांच्यातील संघर्षामुळे जागतिक ऊर्जा पुरवठ्यावर आलेल्या दबावाचा उल्लेख केला.
त्याचा परिणाम जागतिक किमतींवरही होत आहे. त्यामुळे या सर्वांचा विचार करून त्यांची एकमेकांशी तुलना केली पाहिजे. भारतासारख्या देशांनी स्वेच्छेने त्यांच्या ऊर्जा स्रोतांमध्ये विविधता आणली आहे, पण तरीही ते रशियाकडून मोठ्या प्रमाणात ऊर्जा घेत आहेत, कारण एका दिवसात बदल करणे अवघड असते. तथापि, हे देश अमेरिकेचे एक महत्त्वाचे मित्र आणि भागीदार देखील आहेत. त्यामुळे अध्यक्ष या सर्वांचा अभ्यास करण्यासाठी आणि योग्य संयोजन कोणते आहे हे ठरवण्यासाठी हा कालावधी हवा आहे, असे रुबियो म्हणाले.
