मॉस्को: युक्रेनच्या लष्कराने रात्रभरात रशियाला लक्ष्य करून १,००० हून अधिक ड्रोन हल्ले केले, असे अधिकाऱ्यांनी रविवारी सांगितले. रशियाची राजधानी मॉस्कोच्या महापौरांनी या हल्ल्याचे वर्णन मॉस्कोवरील आतापर्यंतचा सर्वांत मोठा हल्ला असे केले आहे. रशियन संरक्षण मंत्रालयाने सांगितले की, त्यांच्या सैन्याने देशभरात, तसेच रशियाच्या ताब्यातील युक्रेनियन द्वीपकल्प क्रिमियामध्ये आणि काळ्या समुद्राच्या पाण्यात १,१०० युक्रेनियन ड्रोन पाडले.
मॉस्कोचे महापौर सर्गेई सोब्यानिन म्हणाले, की रशियन राजधानीच्या दिशेने येणारे ४५० ड्रोन नष्ट करण्यात आले. त्यांच्या म्हणण्यानुसार, त्यापैकी काहींनी मॉस्कोमधील एका तेल शुद्धीकरण कारखान्याला आणि एका निवासी इमारतीला लक्ष्य केले. युद्धानंतरच्या रशियातील पहिल्या संसदीय निवडणुकांच्या तिसऱ्या आणि अंतिम दिवशी युक्रेनने हा मोठा हल्ला केला आहे.
या निवडणुकीत अध्यक्ष व्लादिमीर पुतिन यांच्या धोरणांना विरोध करणाऱ्या विरोधी पक्षांची उपस्थिती जवळपास नगण्य होती आणि यामुळे क्रेमलिनचे वर्चस्व आणखी मजबूत होण्याची शक्यता व्यक्त करण्यात येत आहे.
युक्रेनवर पूर्ण-प्रमाणात आक्रमण केल्यानंतर मॉस्कोने ताब्यात घेतलेल्या प्रदेशांतील रहिवासी, रशियाच्या संसदीय निवडणुकीत प्रथमच सहभागी होत आहेत. रशियन अध्यक्षांचे अधिकृत कार्यालय असलेल्या क्रेमलिनने, ताब्यात घेतलेल्या प्रदेशांवर नियंत्रण मजबूत करण्याच्या प्रयत्नांचा हा एक भाग आहे. कीव्ह प्रशासनाने या कृतीचा तीव्र निषेध करत, ती बेकायदेशीर असल्याचे म्हटले आहे. दरम्यान, एका मानवाधिकार कार्यकर्त्याच्या मते, या प्रदेशांतील रहिवाशांना निवडणुकीत भाग घेण्यासाठी सक्ती केली जात आहे.
रशियामध्ये शुक्रवारी मतदानाला सुरुवात झाली असून ते रविवारपर्यंत सुरू राहील. मतदारांचा सहभाग वाढवणे हा यामागील उद्देश आहे. तथापि, युक्रेनच्या रशियन-व्याप्त प्रदेशांमध्ये आणि रशियाला लागून असलेल्या काही भागांमध्ये गेल्या महिन्याच्या अखेरीस मतदानाला सुरुवात झाली होती. या प्रदीर्घ प्रक्रियेमागे सुरक्षेचे कारण असल्याचे अधिकाऱ्यांनी सांगितले.
रशियन अधिकाऱ्यांच्या मते, डोनेत्स्क, लुहान्स्क, खेरसॉन आणि झापोरिझिया या प्रदेशांमध्ये ३५ लाखांहून अधिक मतदार आहेत. मॉस्कोचे अधिकारी अनेकदा या प्रदेशांना नवीन प्रदेश म्हणून संबोधतात. हे प्रदेश अद्याप पूर्णपणे रशियाच्या नियंत्रणाखाली नसतानाही, सप्टेंबर २०२२ मध्ये रशियाने ते आपल्यात समाविष्ट केले. रशियाच्या या कृतीला आंतरराष्ट्रीय स्तरावर मान्यता मिळालेली नाही.
डोनेत्स्क प्रदेशाच्या रशियन-व्याप्त भागातील एका मतदान केंद्रावर मतदारांनी आपले मत नोंदवले, तर जवळच एक शस्त्रधारी रशियन सैनिक पहारा देत होता. रशियाचे अध्यक्ष व्लादिमीर पुतिन यांनी बुधवारी एका भाषणात, या प्रदेशांमध्ये स्टेट ड्यूमाच्या कनिष्ठ सभागृहासाठी मतदान करण्याच्या महत्त्वावर भर दिला. ते म्हणाले की, रशियासोबतच्या पुनर्मिलनानंतर प्रथमच या प्रदेशांतील रहिवासी ड्यूमासाठी मतदान करतील.
पुतिन यांनी असेही सांगितले की, लढाईत सहभागी असलेले रशियन सैनिकही मतदान करतील. मॉस्कोने २०१४ मध्ये जोडलेल्या काळ्या समुद्राच्या प्रदेशातील क्रिमियामध्येही मतदान होत आहे. युद्धादरम्यान स्टेट ड्यूमाची ही पहिलीच निवडणूक असून, क्रेमलिनचे राजकीय वर्चस्व मजबूत करणे आणि युद्धाला जनतेचा पाठिंबा दर्शवणे, हे या निवडणुकीचे उद्दिष्ट आहे.
कीव्ह प्रशासनाने या भागांमधील मतदान बेकायदेशीर घोषित केले आणि परदेशी सरकारांना व आंतरराष्ट्रीय संघटनांना या निवडणुकांना मान्यता न देण्याचे आवाहन केले. त्यांनी युक्रेनियन नागरिकांना इशारा दिला की, मतदानात सहभागी झाल्यास फौजदारी कारवाई होऊ शकते.
दरम्यान, युरोपियन कमिशनचे प्रवक्ते ख्रिश्चन विगांड म्हणाले की, रशियाच्या ताब्यातील भागांमधील मतदान हे आंतरराष्ट्रीय कायद्याचे आणखी एक उघड उल्लंघन आहे. युरोपियन युनियन तात्पुरत्या ताब्यातील युक्रेनियन प्रदेशांमध्ये झालेल्या या तथाकथित, बनावट निवडणुकांना किंवा त्यांच्या निकालांना कधीही मान्यता देत नाही आणि देणार नाही.
