वॉशिंग्टन: नोव्हेंबरनंतर काँग्रेसच्या दोन्ही सभागृहांवरील आपल्या पक्षाचे नियंत्रण कायम राहिल्यास, प्रत्येक प्रौढ अमेरिकन नागरिकाला ५,००० डॉलर्स देण्याचे लालूच दाखवून, रिपब्लिकन पक्षाच्या मध्यावधी अधिवेशनाच्या उद्घाटन सोहळ्याची अमेरिकेचे अध्यक्ष डोनाल्ड ट्रंप यांनी सांगता केली. या अब्जाधीश नेत्याने आपल्या या दाव्यासोबतच, आपण निवडणुकीच्या रिंगणात उतरलो आहोत, असे आपल्या समर्थकांनी ‘भासवावे’ असे आवाहनही केले.
जर रिपब्लिकन जिंकले, तर तुम्ही आमच्यासोबत जिंकाल आणि तुम्हाला ५,००० डॉलर्स मिळतील. याला ‘ट्रम्प डिव्हिडंड’ म्हटले जाईल, असे ते डलास येथील पक्षाच्या अधिवेशनात बोलताना म्हणाले. डेमोक्रॅट्सच्या तुलनेत जनमत चाचण्यांमध्ये रिपब्लिकन पक्षाची कामगिरी खालावली आहे.
किमान १ ट्रिलियन डॉलर्स खर्च येऊ शकणारा हा प्रस्ताव, आर्थिक आणि राजकीयदृष्ट्या अव्यवहार्य मानला जातो. हा पैसा कुठून येणार हे अध्यक्षांनी स्पष्ट केले नाही, केवळ आपला देश खूप पैसा कमवत आहे, असे नमूद केले.
अलीकडील जनमत चाचण्यांनी दाखवून दिले आहे, की ट्रम्प यांचे लोकप्रियता मानांकन ३० टक्क्यांच्या आसपास आहे, कारण वाढत्या महागाई आणि त्यांनी इराणविरुद्ध सुरू केलेल्या युद्धामुळे मतदार संतप्त झाले आहेत. दरम्यान, डिसिजन डेस्क एचक्यूच्या अंदाजानुसार, नोव्हेंबरमध्ये डेमोक्रॅट्स हाऊसमध्ये २३०-२०५ आणि सिनेटमध्ये ५१-४९ अशा बहुमताने विजय मिळवतील.
आपल्या भाषणादरम्यान, ट्रम्प यांनी इराणमधील अलोकप्रिय युद्धाचा वारंवार उल्लेख केला. इतकेच नव्हे तर त्यामुळे अमेरिकेच्या अर्थव्यवस्थेला फटका बसला आहे हे देखील त्यांनी मान्य केल्याचे दिसले.
साम्यवादाची लाट अमेरिकेला धोका देत आहे. जर ते जिंकले तर हा एक साम्यवादी देश बनेल, असे ते म्हणाले.असा इशारा देऊन ते पुढे म्हणाले, की आपला देश पुढील २५० वर्षांच्या वाटचालीस सुरुवातीलाच अडखळणार की कधीही मागे वळून न पाहता वेगाने पुढे झेप घेणार, हेच तुमचे मत ठरवणार आहे.
उपराष्ट्रपती जेडी व्हान्स यांच्या प्रमुख भाषणानंतर, रिपब्लिकन नेते गुरुवारी अधिवेशनाच्या समारोपासाठी परत येणार आहेत. ट्रम्प प्रत्यक्षात निवडणुकीत उभे नसतानाही, त्यांच्या अध्यक्षपदावर नाराज झालेल्या अपक्ष मतदारांना आणखी दुखावल्याशिवाय, त्यांच्याशी वैयक्तिकरित्या एकनिष्ठ असलेल्या मतदारांना संघटित करू शकतील, असा रिपब्लिकन पक्षाचा डाव आहे.
