एनडीएमध्ये सहभागी होण्याची शक्यता शरद पवारांनी फेटाळली

मुंबईः राष्ट्रवादी काँग्रेस पक्ष लवकरच राष्ट्रीय लोकशाही आघाडीमध्ये (एनडीए) सामील होणार, अशा चर्चांना पक्षाचे नेते शरद पवार यांनी अखेर पूर्णविराम दिला आहे. सोमवारी मुंबईत झालेल्या पक्ष कार्यकर्त्यांच्या सभेत त्यांनी हे स्पष्ट केले आहे. पंतप्रधान नरेंद्र मोदी यांच्याबरोबर झालेल्या भेटीनंतर, राष्ट्रवादी काँग्रेस पक्ष एनडीएमध्ये सामील होणार, अशा चर्चांना उधाण आले होते.

आपण कुठेही जाणार नाही. आम्ही कोणासोबत जाणार नाही, तुम्हाला यायचे असेल तर आमच्यासोबत या, असे पवार म्हणाले. या वक्तव्यामुळे अजित पवार गटाच्या नेत्या सुनेत्रा पवार यांनाही त्यांनी अप्रत्यक्ष संदेश दिला आहे.

शरद पवार यांच्या वक्तव्यानंतर, त्यांचा पक्ष महाराष्ट्रात महाविकास आघाडीसोबत आणि राष्ट्रीय स्तरावर भारत आघाडीसोबत मिळून काम करेल, असे मानले जात आहे. शरद पवार भारतीय जनता पक्षासोबत हातमिळवणी करून एनडीएमध्ये सामील होऊ शकतात, अशी अटकळ गेल्या काही महिन्यांपासून बांधली जात होती. त्याचबरोबर राष्ट्रवादी काँग्रेसच्या दोन्ही गटांचे विलीनीकरण होईल, अशी शक्यताही वर्तविली जात होती. मात्र, शरद पवार यांनी या सर्व शक्यता फेटाळून लावल्या आहेत.

शरद पवार यांनी राष्ट्रवादी काँग्रेस पक्षाच्या बैठकीत झालेल्या चर्चेचा तपशीलही दिला. ते म्हणाले, की कार्यकर्त्यांशी सुमारे अडीच तास चर्चा झाली. दुष्काळी परिस्थितीसंदर्भात विविध मागण्या ऐकल्या. प्रदेशाध्यक्षांच्या निर्देशानुसार आंदोलनादरम्यान सरकारला सादर करायच्या निवेदनासंदर्भात माहिती देण्यात आली आहे. रविवारी कोअर कमिटीची बैठक झाली आणि राज्य सरकारने पूर्ण कराव्यात अशा मागण्यांचा तपशील असलेले निवेदन सादर करण्यात आले आहे.

शरद पवार म्हणाले, पुढील दोन ते चार दिवसांत या मागण्या पूर्ण करण्यासाठी आम्ही सरकारकडे आग्रह धरू. आम्हाला भांडायचे नाही, पण आमच्या मागण्या पूर्ण न झाल्यास आम्ही रस्त्यावर उतरून आंदोलन करू.

दुष्काळी परिस्थिती पाहता सरकारने शेतकऱ्यांना सक्षम करण्याची गरज आहे, असे सांगून ते म्हणाले, की दुष्काळाच्या काळात राज्य सरकार आणि केंद्र सरकार या दोघांनाही अनेक निर्णय घ्यावे लागतात. केंद्रीय मंत्रिमंडळातील आपल्या कार्यकाळातील एक अनुभव सांगताना ते म्हणाले, की तत्कालीन पंतप्रधान मनमोहन सिंग यांनी एक बैठक बोलावली होती. दुष्काळाच्या काळात खासदारांना निर्णय घेण्याचे अधिकार दिले पाहिजेत, असे त्यांनी सांगितले होते.