जेरुसलेमः इस्राईलचे पंतप्रधान बेंजामिन नेतान्याहू यांनी रविवारी संयुक्त अरब अमिरातला भेट दिली आणि देशाचे अध्यक्ष शेख मोहम्मद बिन झायेद यांची भेट घेतली, असे दोन्ही देशांनी सोमवारी सांगितले. या भेटीशी संबंधित एका इस्राईली सूत्राने सांगितले की, या गुप्त बैठकीत प्रामुख्याने इराणवर चर्चा झाली. इराण हे एक असे क्षेत्र आहे दोन्ही देशांनी इराण-अमेरिका यांच्यातील युद्धाच्या काळातही, आपले संबंध आणि सहकार्य अधिक दृढ ठेवले आहे. संयुक्त अरब अमिरातीची सरकारी वृत्तसंस्था ‘डब्लूएएम’नेही उभय नेत्यांच्या भेटीच्या वृत्ताला दुजोरा दिला आहे.
दोन्ही नेत्यांनी संयुक्त अरब अमिरात आणि इस्रायल यांच्यातील द्विपक्षीय संबंधांवर आणि ते अधिक दृढ व विकसित करण्याच्या मार्गांवर चर्चा केली, असे ‘डब्लूएएम’ने आपल्या वृत्तात म्हटले आहे. या बैठकीत दोन्ही देशांमधील संबंध दृढ करणे आणि प्रादेशिक आव्हाने, यावर लक्ष केंद्रित करण्यात आले होते, असे इस्राईलच्या पंतप्रधान कार्यालयातर्फे सांगण्यात आले.
या भेटीत नेतान्याहू यांच्या पत्नी, राष्ट्रीय सुरक्षा परिषदेचे प्रमुख, मोसादचे प्रमुख, एक लष्करी सचिव आणि एक राजकीय सल्लागार यांचा समावेश होता.
हा दुर्मिळ दौरा इस्रायलच्या २७ ऑक्टोबरच्या निवडणुकीच्या ठीक एक महिना आधी आणि हारेत्झ व द न्यूयॉर्क टाइम्सच्या वृत्तांकनामुळे इस्राईलमध्ये वाढलेल्या राजकीय वादाच्या पार्श्वभूमीवर होत आहे. ७ ऑक्टोबर २०२३ च्या हल्ल्याच्या काही दिवस आधी शेख मोहंमद यांनी नेतान्याहू यांना हमासच्या एका मोठ्या कारवाईबद्दल इशारा दिला होता, असा आरोप या वृत्तांकनात करण्यात आला होता.
अटलांटिकने स्वतंत्रपणे वृत्त दिले की, इजिप्तचे गुप्तचर प्रमुख अब्बास कामेल यांनी २६ सप्टेंबर २०२३ रोजी इस्राईलला भेट देऊन गाझामध्ये स्फोट होईल, असा इशारा दिला होता. आणि रविवारी, द वॉल स्ट्रीट जर्नलने वृत्त दिले की, गाझाबद्दल इजिप्तकडून इस्राईलला किमान तीन इशारे देण्यात आले होते, त्यातील शेवटचा इशारा हल्ल्याच्या काही दिवस आधी नेतान्याहू यांना फोन करून देण्यात आला होता.
नेतान्याहू यांच्या कार्यालयाने कोणताही इशारा मिळाल्याचे वारंवार नाकारले आहे आणि हे अहवाल त्यांना निवडणुकीत नुकसान पोचवण्याच्या उद्देशाने रचलेली बनावट खोटी माहिती असल्याचे सांगत फेटाळून लावले आहेत. परंतु त्यांच्या विरोधकांनी, ७ ऑक्टोबर २०२३ रोजी होणारा हल्ला रोखण्यात आलेल्या अपयशाबद्दल जबाबदारी निश्चित करण्याबाबत प्रचाराचा मुख्य मुद्दा बनवण्यासाठी या आरोपांचा वापर केला आहे.
